У красавiцкiм нумары часопiса «Маладосць» выйшла чарговая аповесць Мiколы Купрэева, больш вядомага ў нашай краiне як самабытны нацыянальны паэт. У апошнi час 68-гадовы жыхар Пружан актыўна пiша i прозу. Кожны год па аповесцi — такую творчую задачу паставiў перад сабою Мiкалай Сямёнавiч сем гадоў таму i дакладна яе выконвае. «Лiсты з млына» — сёмы празаiчны твор, як i папярэднiя, безумоўна, выклiкае цiкавасць у чытачоў i рэзананс лiтаратурнай крытыкi. Ужо сёння Мiколу Купрэеву асобныя лiтаратуразнаўцы прадказваюць славу сучаснага класiка мастацкага слова. Ён — член Саюза беларускiх пiсьменнiкаў, лаўрэат лiтаратурнай прэмii iмя Аркадзя Куляшова, аўтар двух паэтычных зборнiкаў.